சீர்காழி, பிப். 22-
தனியார் அனல் மின் நிலையம் அமைக்க எதிர்ப்பு தெரிவித்து மீனவ கிராம மக்கள் வீடுகளில் கருப்பு கொடி கட்டி போராட்டம் நடத்தினர். நாகை மாவட்டம் சீர்காழி அருகே பெருந்தோட்டம் பகுதியில் தனியார் அனல் மின் நிலையம் அமைக்கும் பணிகள் நடந்து வருகிறது.
மேலும் இதற்காக விவசாயிகளின் நிலங்களை கையகப்படுத்தும் பணிகளும் தற்போது மும்முரமாக நடந்து வருகிறது. இந்நிலையில் இந்த பகுதியில் அனல் மின்நிலையம் அமைத்தால் விவசாயிகள், மீனவர்களின் வாழ்வாதாரம் பாதிக்கப்படும் என்று கிராம மக்கள் எதிர்ப்பு தெரிவித்து போராடி வருகின்றனர்.
இதற்கிடையே கடந்த வாரம் நாகை கலெக்டர் முனுசாமி தலைமையில் கருத்து கேட்பு கூட்டம் நடந்தது.கூட்டத்திலும் கிராம மக்கள் கடும் எதிர்ப்பு தெரிவித்து கோஷம் போட்டதால் பரபரப்பு ஏற்பட்டது.
இந்நிலையில் பெருந்தோட்டம் அருகேயுள்ள சாவடி குப்பம் மீனவ கிராமத்தில், 300-க்கும் மேற்பட்ட வீடுகளில், அனல் மின் நிலையம் அமைக்க எதிர்ப்பு தெரிவித்து கருப்பு கொடி கட்டி போராட்டம் நடத்தினர்.
மேலும் சுமார் 500-க்கும் மேற்பட்ட மீனவர்கள் கடலுக்கு மீன்பிடிக்க செல்லாமல் வேலை நிறுத்தத்தில் ஈடுபட்டனர். மீனவ கிராம மக்களின் திடீர் போராட்டத்தால் சீர்காழி பகுதியில் பரபரப்பை ஏற்படுத்தியுள்ளது.
No comments:
Post a Comment